Vulgata Clementina online

Liber Sapientiae, 7

¹ Sum quidem et ego mortalis homo, similis omnibus, et ex genere terreni illius qui prior factus est: et in ventre matris figuratus sum caro ;

² decem mensium tempore coagulatus sum in sanguine: ex semine hominis, et delectamento somni conveniente.

³ Et ego natus accepi communem aërem, et in similiter factam decidi terram, et primam vocem similem omnibus emisi plorans.

⁴ In involumentis nutritus sum, et curis magnis:

⁵ nemo enim ex regibus aliud habuit nativitatis initium.

⁶ Unus ergo introitus est omnibus ad vitam, et similis exitus.

⁷ Propter hoc optavi, et datus est mihi sensus ; et invocavi, et venit in me spiritus sapientiæ:

⁸ et præposui illam regnis et sedibus, et divitias nihil esse duxi in comparatione illius.

⁹ Nec comparavi illi lapidem pretiosum, quoniam omne aurum in comparatione illius arena est exigua, et tamquam lutum æstimabitur argentum in conspectu illius.

¹⁰ Super salutem et speciem dilexi illam, et proposui pro luce habere illam, quoniam inextinguibile est lumen illius.

¹¹ Venerunt autem mihi omnia bona pariter cum illa, et innumerabilis honestas per manus illius ;

¹² et lætatus sum in omnibus, quoniam antecedebat me ista sapientia, et ignorabam quoniam horum omnium mater est.

¹³ Quam sine fictione didici, et sine invidia communico, et honestatem illius non abscondo.

¹⁴ Infinitus enim thesaurus est hominibus ; quo qui usi sunt, participes facti sunt amicitiæ Dei, propter disciplinæ dona commendati.

¹⁵ Mihi autem dedit Deus dicere ex sententia, et præsumere digna horum quæ mihi dantur: quoniam ipse sapientiæ dux est, et sapientium emendator.

¹⁶ In manu enim illius et nos et sermones nostri, et omnis sapientia, et operum scientia, et disciplina.

¹⁷ Ipse enim dedit mihi horum quæ sunt scientiam veram, ut sciam dispositionem orbis terrarum, et virtutes elementorum,

¹⁸ initium, et consummationem, et medietatem temporum, vicissitudinum permutationes, et commutationes temporum,

¹⁹ anni cursus, et stellarum dispositiones,

²⁰ naturas animalium, et iras bestiarum, vim ventorum, et cogitationes hominum, differentias virgultorum, et virtutes radicum.

²¹ Et quæcumque sunt absconsa et improvisa didici: omnium enim artifex docuit me sapientia.

²² Est enim in illa spiritus intelligentiæ, sanctus, unicus, multiplex, subtilis, disertus, mobilis, incoinquinatus, certus, suavis, amans bonum, acutus, quem nihil vetat, benefaciens,

²³ humanus, benignus, stabilis, certus, securus, omnem habens virtutem, omnia prospiciens, et qui capiat omnes spiritus, intelligibilis, mundus, subtilis.

²⁴ Omnibus enim mobilibus mobilior est sapientia: attingit autem ubique propter suam munditiam.

²⁵ Vapor est enim virtutis Dei, et emanatio quædam est claritatis omnipotentis Dei sincera, et ideo nihil inquinatum in eam incurrit:

²⁶ candor est enim lucis æternæ, et speculum sine macula Dei majestatis, et imago bonitatis illius.

²⁷ Et cum sit una, omnia potest ; et in se permanens omnia innovat: et per nationes in animas sanctas se transfert ; amicos Dei et prophetas constituit.

²⁸ Neminem enim diligit Deus, nisi eum qui cum sapientia inhabitat.

²⁹ Est enim hæc speciosior sole, et super omnem dispositionem stellarum: luci comparata, invenitur prior.

³⁰ Illi enim succedit nox ; sapientiam autem non vincit malitia.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: