Vulgata Clementina online

Epistula ad Titum, 2

¹ Tu autem loquere quæ decent sanam doctrinam:

² senes ut sobrii sint, pudici, prudentes, sani in fide, in dilectione, in patientia:

³ anus similiter in habitu sancto, non criminatrices, non multo vino servientes, bene docentes:

⁴ ut prudentiam doceant adolescentulas, ut viros suos ament, filios suos diligant,

⁵ prudentes, castas, sobrias, domus curam habentes, benignas, subditas viris suis, ut non blasphemetur verbum Dei.

⁶ Juvenes similiter hortare ut sobrii sint.

⁷ In omnibus teipsum præbe exemplum bonorum operum, in doctrina, in integritate, in gravitate,

⁸ verbum sanum, irreprehensibile: ut is qui ex adverso est, vereatur, nihil habens malum dicere de nobis.

⁹ Servos dominis suis subditos esse, in omnibus placentes, non contradicentes,

¹⁰ non fraudantes, sed in omnibus fidem bonam ostendentes: ut doctrinam Salvatoris nostri Dei ornent in omnibus.

¹¹ Apparuit enim gratia Dei Salvatoris nostri omnibus hominibus,

¹² erudiens nos, ut abnegantes impietatem, et sæcularia desideria, sobrie, et juste, et pie vivamus in hoc sæculo,

¹³ exspectantes beatam spem, et adventum gloriæ magni Dei, et Salvatoris nostri Jesu Christi:

¹⁴ qui dedit semetipsum pro nobis, ut nos redimeret ab omni iniquitate, et mundaret sibi populum acceptabilem, sectatorem bonorum operum.

¹⁵ Hæc loquere, et exhortare, et argue cum omni imperio. Nemo te contemnat.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados:

Compartilhe este capítulo da bíblia: